الفرق بين.. "حب الراجل وحب الست".
(هذا المقال توضيحي فقط.. يعني ماحدش ياخده على جوة!.)
لو إتحط "الحب" في كفتين ميزان واحدة للراجل والثانية للست.. أسفا أقول لك إن كفة الست هي اللي هاتطُب..وبجدارة، والكلام ده معلوم للجميع فلا داعي للحساسيات أو إعتبار كلامي تحيُز لطرف ما.. وإنما هو مجرد إعتراف بحقيقة وتسلميا بها.
والحقيقة هي إن مفهوم "الحب" عند كل واحد منهم مختلف كليا وعبر عنه أستاذنا الراحل (أنيس منصور) في تعبير عبقري قال فيه "الحب مرحلة من حياة الرجل ولكنه كل حياة المرأة" ودي حقيقة لا يسطيع راجل إنكارها.
وخلينا نتفق في الأول إن فيه صفات كثير في الحب الست بتاخد فيها الأفضلية بفطرتها اللي ربنا خلقها بيها زي الحنان، والتعبير عن المشاعر، والرعاية، والاهتمام، والاحتواء، رغم إنهم المفروض يكونوا صفات متساوية في الطرفين ولكن الراجل لما بيعمل كده بيكون طبع فردي وحسن تربيته ونضج عقله وتفهمه وحبه للست اللي معاه ليهم دور، وفي رأيي إن الست في الحب بتكون (أم) أكثر والراجل في الحب كثيرا بيكون طفل صغير أو أب فقط في تسلطه وتحكماته وقيوده.
وأول نقطة بترجح كفة حب الست إنها بتنفذ أول وأهم شرط في الحب وهو (التقبل التام) فالست لما بتحب راجل بتحبه كما هو كده كله على بعضه بعيوبه والدليل إن أحيانا كثير بتلاقي ست بتحب ومكملة ومستحملة وبتسامح وبتصبر برغم وجود عيوب قاتلة في الراجل ممكن تكون بتضرها وبتفضل مكملة في علاقتها لحد ما موتور العلاقة دي يفوت منها، ولكن الغالبية العظمى من الرجال هو بيتقبل الست كما هي في الأول بس لحد مايتمكن أو يصبح ذو سلطة عليها –من وجهة نظره- وبعد كدة يمارس أعظم هواياته الذكورية في تشكيلها كست على مزاجة ووفقا لرغاباته وكما هو عايزها تكون.
والنقطة الأخرى اللي بتزيد من كفة الست في الحب إنها لما بتحب راجل فعلا بتكون عايزاة في حياتها "بطل أوحد" وبتسكنه في كل الأدوار يعني يبقى صاحب، وابن، وأب، وحبيب وكله.. وبتستنى تكون هي كمان بالنسبة له كدة، لكن الراجل مش دائما في حبه بيكتفي بست واحدة وهنا نضج الراجل وحقيقة حبه للست وتوافقهم بيلعب دور كبير.. ولكن بعض الرجال بيحب يحط ست أو أكثر في كل دور وده مزروع في عاقله من وهو مراهق صغير جميل لما فهموه إن فيه ست للحب وست للجواز، وبعد الجواز فيه ست للبيت وللعيال وست للفرفشة والإنسباط.. وده في نظري تصنيف ظالم وأنانية منه بل وطبعا هي خيانة صريحة والخيانة لا تجتمع مع الحب.. إلا في عقول الذكور!.
كمان طبيعة تكوين الراجل والست بتوجد اختلافات عظيمة بينهم في الطريقة اللي بتشتغل بيها مشاعرهم واحتياجاتهم.. فالست احتياجاتها من الحب عاطفية أكثر زي الاحساس بالأمان والاهتمام والاحتواء والمشاركة والحنية والسند إلخ.. وده أهم عندها من حاجات ثانية هي من أولويات الراجل زي (الجنس) مثلا فالراجل غريزته بتحكم جزء من مشاعره وتحديدا لو لم يكن ناضج كفاية وسايب غريزته تسوقه وأحيانا بيكون جزء من وقوعه أصلا في الحب أو طريقة لتعبيره عنه لكن العكس الصحيح عند الست فالحب والعلاقة السليمة شرط أولي وأساسي للجنس وهو مش الوسلية الأمثل عندها في التعبير عن الحب.. والفرق هنا بينهم يا محترم كبير قوووي.
ده غير إنه مفاهيمهم نفسها جوة علاقتهم ببعض مختلفة من أول كلمة "بحبك" فهى عند الست عهد مقدس، أما عند الراجل فهي كلمة بتعبر عن مشاعر أو عشان الست بتحب تسمعها لكن لا تمثل في ثقافتنا أي إلزام حقيقي إلا لو نابع من جوة الراجل نفسه، عندك كمان مفهوم (العطاء) فالست في الحب بتدي أكثر مابتاخد وصعب تلاقي ست بتحب وبخيلة في مشاعرها ووقتها واهتمامها براجل بتحبه بل وأحيانا بفلوسها كمان، لكن الراجل ممكن يبخل على واحدة بيحبها والموضوع مش في دماغه أو حساباته في العطاء مختلفة تماما ده غير إن البعض منهم بيبقى جزء من مفهوم الحب عنده إنه ياخد وبس لذلك تجد ست بتسيب راجل وكل أسبابها هي.. إنه أناني، ثم مفهوم (الإخلاص) نفسه سواء للراجل أو للعلاقة نفسها فالحب عند الست وعد منها بإنها تكون للراجل اللي بتحبه وبتكون مُستعده تعيش معاه عمرها كله من غير ماتفكر في أي إحتملات أخرى، أما الراجل فممكن قدام يزهق ومشاعره تتغير أو تروح لست تانية لذلك تجد رجالة كثير بعد الجواز بيكتشف إنه إتسرع أو إنه مش عايز يكمل مع الست دي، كمان (التضحية) فالست تاخد المركز الأول عن جدارة في تقديم التضحيات والتنازلات الغير مشروطة في سيبل حبها ونجاح حياتها مع راجل بتحبه أو حافظا على بيتها في حالة الجواز وبتكون أكثر بقاء على العلاقة حتى لو على حسابها نفسها هي، الراجل ممكن يضحي ولكن تضحياته محسوبة وتنازلاته غالبا ما بتكون مشروطة ولكنه بيشترك مع الست في إنه لو فعلا باقي على علاقتهم وبيحبها قد يضحي بالكثير ولكن مش بنفس الدرجة، ثم مفهوم (تغيير الآخر) وده مفهوم مشترك مابينهم فيه ست أحيانا بتحب تغير راجل بس غالبا بيكون تغيرها هي للأفضل أما الراجل فرغبة تغييره للست بتبدأ من شكلها يعني لو بشعرها عايزها محجبة أو العكس ولو رفيعة عايزها أتخن وشويا والعكس، ثم حياتها يعني لو بتشتغل فتبطل شغل أو تغير من حياتها الإجتماعيه، ثم من شخصيتها بتغيير اهتماماتها وطريقة تعاملها مع الناس إلخ.. وغالبا ما بيكون التغيير سلبي عليها، كمان مفهوم (الثقة) فالست لما بتحب راجل بتدي له ثقة مطلقة إلى أن يثبت العكس، أما ثقة الراجل فهى بتتبني تدريجيا وثقته هو في نفسه بتلعب دور كبير في ثقته في الست، وده ياخدنا لمفهوم (الخيانة) طبعا الست لو حبيت مستحيل تخون لأنها لما بتحب عينيها مابتشوفش أصلا أي راجل آخر ده غير إن الست لا تحترم نفسها في حالة التفكير أصلا في الخيانة، أما الراجل يا عيني عليه عينية بتلمح كل ما هو جميل حوالية وزي ما قال عنه برضه أستاذنا أنيس منصور "قلب الراجل كالولاعة متى أراد الحب.. ولع" ده غير إن خيانته مسموح بيها في مجتمعه مش جريمة يعني زي الست فهي نزوة وحادث عادي ولكن أكيد هناك بالطبع راجل بيحب ست ومابيخونهاش.
في النهاية احنا هنا مش بنقول مين الأفضل وطبعا هناك اثتثنائات من الجنسين ولكننا قدام صورة واقعية تخليك تعترف كراجل تقف احتراما وتسقف وتعترف إن الست أشطر وأصدق في فن الحب.
إرسال تعليق