مراجعة فيلم " Dune " .... ( مغامرة - دراما - اكشن ) .
" لا يوجد حرق لأحداث الفيلم "
قصة الفيلم بكل بساطة بتحصل فى المستقبل البعيد اوى و بتتكلم عن شاب اسمه " بول اتريدس " .....
وريث عائلة " اتريدس " الملكية المسيطرة على قطاعات كثيرة و تابعة لحكم إمبراطورية كبرى .....
و فى صراعات و حروب ما بين عائلة اتريدس و فصائل أخرى على السيطرة على صحراء كوكب " اراكيس " بسبب احتواء رماله على المادة الأغلى فى الكون فى هذا الوقت ....
و فى نفس الوقت فى أسطورة منتشرة عن شخص ما هيجى فى وقت ما من الزمان و يكون ليه دور عظيم فى شئ ما فى هذا الكون و من المرجح أن يكون هذا الشخص هو " بول اتريدس " ......
و بس كده و بنتابع بداية رحلة بطلنا نحو المستقبل الذى ينتظره ، و بنتعرف على هذا العالم و ما يدور فيه .
مبدئيا مهم تعرف ام الفيلم ده هو الجزء الاول من ثلاثية هيتم اصدار الجزئين الباقين منها خلال السنوات القادمة .....
بمعنى أن أحداثنا مش هتنتهى مع نهاية الفيلم ده و الافلام مكملة لبعضها .....
الفيلم هنا بقى نقدر نقول القشرة الخارجية للقصة شبه قصص كتير شوفناها فى افلام و روايات .....
و الى هى ببساطة قصة البطل الاسطورى المنتظر أنه يظهر و يخلى كل حاجة حلوة فى ظل صراعات و حروب قائمة .....
و طبعا ده مع اختلاف المسميات و طبيعة الزمان و المكان و العقائد و النظرة الفلسفية إلى بنشوف الأمر من خلالها .....
و مش معنى كلامى أن الفيلم وحش اطلاقا ، لأن مش كل قصة اسسها بسيط هينتج عنها فيلم بسيط و لا كل قصة اسسها مختلف و جديد هينتج عنها فيلم عظيم .....
و الشئ الحاسم دائما فى هذا الأمر هو بكل تأكيد صانع هذا العمل ....
و صانع العمل معانا هنا ككتابة و اخراج ، و بالنسبالى هو البطل الاول فى هذة الملحمة ....
المخرج و الكاتب الغنى عن التعريف لكل عشاق السينما " Denis Villeneuve " ....
و بقول إنه بالنسبالى هو البطل الرئيسى لهذا العمل ، لأنه فعلا ضمن للفيلم ده على أقل تقدير ترشيحات الأوسكار عن كل الفئات التقنية المتعلقة بالصورة و الصوت .....
و قدملنا ملحمة بصرية و سمعية أقل ما يقال عنها انها مبهرة لأبعد حد .....
و قدر برؤيته أنه يخلى للقصة و هذا العالم شخصيتهم الفريدة و كان فى اهتمام واضح بتفاصيل كتير جدا ....
و من أبرزها الازياء و آلية عمل بعض الأدوات و الآلات المتقدمة تقنيا و الاهتمام بتفاصيل تشغيلها ده كله بيساعد انك تدخل اكتر فى الأجواء العامة للعالم و تبقى حاسس كل حاجة بتحصل .....
بالنسبة بقى لأحداث الفيلم فنص الفيلم الاول رغم أنه كان بيتحرك براحة لكن كنت متفهم جدا و مهيئ نفسى أن الفيلم ده كله اكيد هيكون تمهيد لما هو قادم .....
و ده فعلا إلى حصل فى النص الاول إلى كان بالنسبالى هو الامتع على مستوى سرد القصة و احنا بنكتشف هذا العالم المجهول و الملئ بالطوائف المختلفة و الصراعات و المعتقدات ...
و كانت المتعة بالنسبالى مضاعفة بسبب الجوانب التقنية الى اتكلمت عليها .....
بالنسبة بقى للنص الثانى من الفيلم ، هو برضه حلو و مكنش ممل خالص .....
لكن بالنسبالى مكنش محسوس زى النص الاول إلى كنت حرفيا مبهور به .....
و ده بسبب انى حسيت أن الفيلم أقحم معركة فى الأحداث من غير تحضير كافى لدوافع أطرافها كاملة ، رغم أهمية المعركة دى و نتاجئها فيما هو قادم .....
فانا متفهم ليه المعركة دى حصلت و ليه الاكشن زاد و مشاهد القتال فى النص الثانى ، لان الجمهور العادى هيكون مستنى ده يحصل ....
بس بالنسبالى مكنش عندى اى مشكلة أن الجزء ده كله ميبقاش فيه معارك كبيرة خالص و نكمل تعريف الشخصيات و نديهم نفس المساحة ....
بالنسبة بقى لمشاهد الاكشن كاتنفيذ المشاهد الواسعة كانت جميلة جدا بصريا ....
لكن مشاهد القتال القريبة كانت عادية اوى بالنسبالى و اظن سبب ده بنسبة كبيرة هو تقييم الفيلم ( PG-13 ) .....
نختم بقى بواحدة من افضل مميزات الفيلم و هى الموسيقى التصويرية إلى قدمهلنا " Hans Zimmer " كانت برضه مبهرة و هتآثر فيك و انت بتسمعها .
فيلم " Dune " إجمالا فيلم جميل جدا و ممتع خصوصا على المستوى التقنى المبهر ، و بداية مبشرة لسلسلة منتظر منها كتير خلال الفيلمين المتبقين و نهاية الفيلم بتبشر بكده جدا .....
الفيلم من احدث انتاجات 2021 و متاح دلوقتى ...
و الى اتفرج على الفيلم يقولنا رأيه فى الكومنتات .
تقييمى للفيلم ...... ( 8 / 10 ) .
النهاردة نزل فيلم "Dune" أونلاين، الفيلم اللي يعتبر أحد أهم الأحداث السينمائية في ٢٠٢١، وملحمة فنية متوقع ان بمرور الوقت هتبقي في نفس مكانة سلاسل كبيرة زي "LOTR" و"Star Wars" و"Harry Potter" وغيرهم.
الفيلم نزل الشهر اللي فات في السينم، وكان فيه فرصة انا والصديق Mohamed Hesham نشوف الفيلم ونكتب عنه مراجعات هنزلها في الكومنتات، والفيلم الصراحة تجربة جميلة محدش يفوتها في السينما.
ولكن اللي هيشوف الفيلم اونلاين لازم يعرف ان الفيلم مش ممل ولا بطئ زي ما الناس بتقول، النص الأول منه مهم جداً علشان تعرف كل تفاصيل عالم "Dune" اللي يعتبر حاجة مختلفة متقدمتش قبل كده.
لازم تركز كويس وانت بتتفرج ان المخرج "دينيي فلينوف" بيساعدك بكل الأدوات اللي معاه علشان تفهم "Dune" كويس وبعد كده في النص التاني منه هتلاقي الأحداث بتشد والقصة بتاخد مجري تاني بيمهد لحاجات كتير في الأجزاء الجاية.
الاهم كمان ان الفيلم ده جزء أول، وفيه فيلمين كمان هيتقدموا قدام شريطة أن الفيلم ينجح علي منصة "HBOMAX"، وإن كان ده مستبعد في ظل تسريبه وتوافره اونلاين.
اتمني كلنا ندعم التجربة دي علشان نشوف منها آكتر واكتر، ومؤكد اللي هيعمل كده مش هيندم خالص
ومشاهدة سعيدة
إرسال تعليق